الرئيسية
أحدث الصور
وصية أب
يا بني·· أرضك منهو يحميها؟
غير انا وانت نحميها
يا بني·· ارضك هي عرضك
هي دمك، ابقلبك خليها
يا بني·· ما نعرف الضيم احنا
عرب، وقاعنا ما نفرّط بيها
يا بني·· اجدادك اسود القاع
جانوا، ولسع اسودن بيها
يا بني·· حفنة من تراب وطنا
تسوى الدنيا وما بيها
حفنة وراسك··
بمال قارون ما اعطيها
يا بني·· وحق عيناك
النصر النا
ما دام حقنا ينادينا
ووصّيك يا بني يوم الحرب
ناراً احرق من يعادينا
وخلّي الرصاص يعانق صدرك
لا تدير ظهرك ويشمتوا بينا
يا بني·· عرب احنا
نفخر بأولنا··
وأولنا يفخر بتالينا
يبه·· وحق عيناك
وعيون أمي السود
آني ليها·
أبوس ترابها،
وبعروق دمي أرويّها
يبه·· أرضي هي أرضك
وهي عرضي
شلون أفرّط بيها
يبه·· سيرة اجدادي ابّالي
وشباب اليوم ما ناسيها
يبه·· وصيتك بقلّبي
ما ازحزح
ولزرع جسمي نخل بيها
جذوره مشربجة بالقاع
وبراسه السما يناطيها
ولو رصاص العدو يصيبه
يفرّخ بالجذع نارا تحاميها
مثل السمندل يبه
احنا ليها
عرب احنا
وقاعنا ما نفرّط بيها
ما نفرّط بيها
يا بني·· بيك افخر
وصدق قولك انت اهلها
بس اقولك يا بني
ارضك·· ارضك
حبّها لا تملها
وخبر ربعك بحجْيك
وخضار اقلبوا محلها
أرضك هي كنزك
يا بني·· بس لو تفلها
ودل ربعك يابني
طريق الجبهة دلها
واحموا اهلكم ترى
انت وربعك اهلها
وانت يازين اهلها
يا زين اهلها·
